प्रो.(डा.) शशि पठानिया अकादमिक तौरा पर इक अनुभवी व्यक्तित्व न। एह् डोगरी विभाग (जम्मू विश्व-विद्यालय) दे अंदर बक्ख-बक्ख औह्‌दें (विभागाध्यक्षा सनै) पर सफलतापूर्वक कम्म करियै रिटायर होने दे बाद बी सक्रिय रूपै कन्नै डोगरी भाशा, व्याकरण, भाशा-विज्ञान, अनुवाद, साहित्य ते लोक-साहित्य लेई कम्म करा दियां न। अपने शिक्षण करियर दे 27एं बʼरें शा मते समें च, इʼनें ऐम्म-फिल. ते पीऐच्च.डी. स्तर उप्पर 35एं कोला मते शोध-कर्ताएं दा मार्गदर्शन कीता।

डोगरी च मशीन अनुवाद दा टूल बनाने आस्तै पीऐच्च. डी. स्तर उप्पर बी सैह् मार्गदर्शक दे तौरा पर इक शोध-छात्रा दा मार्ग-दर्शन कीता। इʼनें गी बʼरा 2012 आस्तै डोगरी च साहित्य अकादमी अनुवाद पुरस्कार कन्नै सम्मानत कीता गेदा ऐ।

डोगरी च इंʼदियां पंज पुस्तकां नः साहित्य आलोचनात्मक लेखें दा इक संग्रैह्, पंजाबी थमां डोगरी च दो पुस्तकें दे अनुवाद, इक कविता संग्रैह् ते लोक-संस्कृति ते लोक-साहित्य उप्पर शोध-लेखें दा इक संग्रैह्। इंʼदियां केईं क्हानियां ते नेकां शोध-पत्र ते डोगरी भाशा-विज्ञान, साहित्यक आलोचना आदि पर लेख बक्ख-बक्ख रसाले ते पत्रिकाएं च प्रकाशत न। इंʼदियें किश रचनाएं दा होरनें भाशाएं च अनुवाद बी कीता गेदा ऐ ते भारतीय साहित्य की पहचान (नालंदा मुक्त विश्व-विद्यालय), भारतीय भाषाओं में महिला साहित्य (भारती विद्यापीठ ते केंद्रीय भारतीय भाषा संस्थान, मैसूर) जनेहे प्रतिश्ठत राश्ट्री संग्रैहें च प्रकाशत होई दियां न।

डोगरी भाशा, शिक्षा ते साहित्य दी सग्गोसारी लेई सरकारी ते गैर-सरकारी प्रोजैक्टें च इं’दे जोगदान बड़े म्हत्तवपूर्ण न, खास करियै डोगरी च डिजटल डवीजन गी घट्ट करने आस्तै एह् 20एं साल्लें शा लगातार अपना जोगदान देआ करदियां न। डिजटल नाबरोबरी गी दूर करने आस्तै इंʼदे प्रमुख जोगदानें च अंग्रेज़ी थमां डोगरी भाशा च 16एं कंप्यूटर साफ्टवेयरें दा स्थानीकरण, इक आनलाइन डोगरी-अंग्रेज़ी-डोगरी शब्दकोश आदि प्रमुख न। इʼनें डोगरी च कंप्यूटर अवधारणाएं उप्पर पाठ्यक्रम दा बी अनुवाद कीते दा ऐ, जेह्‌ड़ा (डी.ओ.ए.सी.सी, जे. ऐंड.के. दे सैहजोग कन्नै) जनता आस्तै आई. टी. साक्षरता आस्तै इक कोर्स ऐ। डिजटल नाबरोबरी गी दूर करने आस्तै भारत सरकार द्वारा रंभे गेदे केइयें म्हत्तवपूर्ण प्रोजैक्टें दा हिस्सा रेही दियां न ते इसलै बी चला करदे प्रोजैक्टें कन्नै बावस्ता न। डोगरी भाशा, साहित्य, संस्कृति ते समाज च इं’दे अनुभव ते जोगदान गी दिखदे होई इ’नें गी केईं स्थानी ते राश्ट्री संस्थानें द्वारा सम्मानत कीता गेदा ऐ ते एह् बक्ख-बक्ख अकादमिक, शैक्षणिक ते सांस्कृतिक समितियें दियां मैंबर बी हैन।

डोगरी साहित्य ते डोगरी कन्नै सरबंधत साहित्य गी लोकें तक्कर पजाने आस्तै एह् www.dogri.org वैबसाइट चलांदियां न। एह्‌दे अलावा, डोगरी संस्था जम्मू दी वैबसाइट www.dogrisanstha.org दा प्रबंधन बी करदियां न।