Pratyek vyakti ki jeevanshaily ke prati ek kalpana,ek vyaktigat vichar,ek mahatvakanksha hoti hai, jise vah sadev aur adhik utkrisht banane ka prayas karta rehta hai.Bas isi disha me apne sukshm nirikshnon evm anubhavo ko sajha karte hue lekhika ne in chhote- chhote lekhon ko rachnattmkta dee hai. Lekhon ko moort roop dene men lekhika ka anubhav,sukshm avlokan aur anusandhan aadharbhoot raha hai.Ek sankhyiki evm banking ki prishti bhumi ke vyakti ka hindi bhasha ke prati aisa lagav evm prabhutv virle hi dekhne me aata hai.

Yah lekh mala dainik jeevan me aane wale anubhavo ko sunder roop se abhivyakt karte hai wahin unke peechhey chhipe karno ka vishleshan kr hamara margdarshan bhi karte hai.Yah chhote chhote lekh lekhika ki samajik parivesh ki vistrit jankari, vyavhar gyan ke sath hi vyang evm manoranjak prastuti ke karan pathaneey bn padi hai.
Lekhon ki bhasha saral hindi hai jisme awashyaktanusar prachlit angreji shbdon ka prayog bahutayat se kiya gya hai.Lekh ghar ki bolchal bhasha me hai jo seedhe antarman ko sparsh karte hain.Lekh jeevan ke prati sakaratmak aur sarthak drishtikon pradan karte hain, hame jeene ki raah dikhate hain aur prerana dete hai.Is prakar yah lekh aadhyatmik jeevan jeene ki margdarshika
Ke saman hain jo bachcho aur badon dono ke liye saman roop se upyogi hain.Kai sthano pr lokoktiyon muhavaron ya lok prasiddh yuktiyon se bat samjhai gai hai.jaise; asi bani boliye mn ka aapa khoy, vahin kai sthano pr lekhika ne apne shabdon ko kavyatmak rup se dhalker hraday sparshi bna diya hai.Sabhi lekh aadhyatmik drashtikon se likhe gaye hai jo jeevan ki vastavikata se avagat karate huye sukhi, santoshi aur sanyami jeevan jeene ki rah dikhate hai.Pustak ka pratyek lekh apne aap me vishisht tatha upyogi hai.Sabhi lekh jeevan ke kisi na kisi ase pahlu ki or dhyan aakrsht karte hain jo vaise to bahut samanya hai parntu jin pr samanyatah hamara dhyan hi nahi jata.Baten sadharan hain parantu vah asadharan rochakata ke sath prastut ki gai hain .Yahi lekhika ki safalta hai.