கவிஞன் பெயர் அருண். இவ்வுலகில் வறுமைத் தொட்டுத் தடவி வளரும் பிள்ளைகளின் இன்னல்களையும் இல்லாமையையும் நன்கு அறிந்த ஒருவன். உழைப்பையும் ஒழுக்கத்தையும் மட்டுமே நம்பி வாழ்வின் ஒவ்வொரு தடையையும் தாண்டி வருபவன். பாடம் முடிக்கவும், மதிப்பெண் எடுப்பதற்காகவும், கல்வி கற்கும் வயதில் கற்றிடாதவன்; தமிழினை உயிருள்ள, சுவாசமுள்ள ஓர் மொழியாகவே போற்றி, பழகி, தொழுது, வாழ்ந்து வருபவன். மிகுந்த ஈர்ப்பும் ஆசையும் காதலும் மதிப்பும் தன் தமிழ் மீது கொண்ட ஒருவன். பல ஆண்டுகாலமாக கையில் எழுதுகோலோடு அலையும் மொழிப்பித்தன் (சுமார் பத்து ஆண்டுகள்). ஐந்நூறுக்கும் மேற்பட்ட கவிதைகளும், பல கதைகளும், பல்வேறு வாழ்வியல் கட்டுரைகளும் எழுத்துப்படைப்புகளுள் அடங்கும். அதில், சமீப காலத்தில் எழுதப்பட்ட கவிதைகளில், பொருக்கி எடுக்கப்பட்ட சிலவற்றை ஒரு தொகுப்பாக்கி வெளியிடும் முயற்சியில் ஈடுபட்டதன் விளைவே இந்தப் புத்தகம், 'தமிழ்த்தருவின் கவிக்கனிகள்'. உலகம் வாசித்து மகிழ, படைப்புகள் பல இன்னும் காத்திருக்கின்றன.