வெறும் எண்களின் தொகுப்பையும், உலோகக் குவியல்களையும் மட்டுமே
'செல்வம்' என மயங்கும் இக்கால உலகியல், மனிதனின் உண்மையான
நிம்மதியையும், கள்ளமற்ற சுற்றத்தையும் அவனறியாமலேயே காவு
வாங்குகிறது.

ஆனால், பழந்தமிழர் கண்ட மெய்யியல் இதுவன்று. அறிவு, திண்மை,
வாய்மை, நற்சுற்றம், பிணியின்மை என விரிவடையும் 'பதினாறு
பேறுகளும்' ஒன்றோடொன்று பிரிக்கவியலாத ஓர் அறக் கட்டமைப்பு.
இதில் நேர்மையை விற்றுப் பொருளை ஈட்டினாலோ, உடலை உருக்கி
நாணயத்தைச் சேர்த்தாலோ ஒட்டுமொத்த வாழ்வின் ஆணிவேரும்
அற்றுப்போகும் என்பதைத் தமிழரின் ஆதி மரபு உணர்த்துகிறது.

போலி மானத்திற்காகச் சுமக்கும் கடன் சுமை, பிறர் மெச்சுவதற்காக
அணியும் முகமூடி, அறம் பிறழ்ந்து தேடும் குறுக்குவழி வெற்றி, இதுபோன்ற
மாயையிலிருந்து விடுபட்டு, மீண்டும் அகத்திண்மையோடும், எதற்கும்
வளைந்து கொடுக்காத தற்சார்போடும் வாழும் கலையைச் சங்கத் தமிழின்
வேர்களிலிருந்து மீட்டெடுக்கிறது இந்நூல்.

இது உங்களை வேறு ஒருவராக மாற்றுவதற்கான உரைநடை அன்று,
உங்களுக்குள் உறங்கிக் கிடக்கும் அந்தத் தொன்ம ஆளுமையை
விழிப்படையச் செய்யும் ஓர் அறைகூவல்.

பகட்டு, அச்சம், கடன் என்னும் விலங்குகளைத் தகர்த்தெறிந்து, 'விடுதலை'
என்னும் பெருவாழ்வை நோக்கிய பயணத்திற்கான வரைபடம்.