Kuch rishte aasmanon par likhe jaate hain, zameen par unhen sirf aazmaishon se guzarna hota hai,
Un ki mohabbat kisi gawahi ki mohtaaj nahi thi. Un ki bunyaad sirf aadhi raat ke sajdon aur nigahon ki paabandi par rakhi gayi thi. Woh dono ek doosre ke liye sirf ek khwab nahi the, balki hudood mein lipti hui ek mukammal dua the, Magar jab taqdeer ne dono ko do alag alag jahanon mein khada kar diya— Use duniya ki sab se bari zeenat ke beechon beech, aur use khamosh yaqeen ke hisaar mein— tab sawaal ye tha: "Kya woh duniyaawi waadon ke samne jhuk jaayega? Ya ye mohabbat, taqwa ki hudood ko paar kar ke, un dono ke liye azal tak ki gawahi ban jaayegi?"
Yeh daastan bhi unhi gehre naqshon mein se ek hai— ek momin aur ek momina ke darmiyan, jahan mohabbat ka paimana duniyawi kashish nahi, balki imaan ka tawazun ban jata hai. Yeh kahani hai Zohaib orebi ki, jo London ke shandaar urooj mein reh kar bhi ek aise sukoon ki talaash mein tha jo bazaaron mein nahi milta. Aur yeh kahani hai Zarish Ibrahim ki, jis ne apne imaan ki shart par, duniya ke sab se qeemti rishte ko bhi ek imtehaan bana diya.
Khaas tor par, is **Urdu Spiritual Novel** ke kuch kirdar, jaise Zarish, Laiba, Shazia, Shireen aur Safeer, haqiqi shakhsiyaat se makhdoos hain. **Yeh novel Women's Development aur Empowerment ki taraf ishara karta hai, jahan Zarish aur Laiba jaise kirdar jahalat ke parde chaak kar ke roohon ko dobara zinda karte hain.** Zohaib aur Zarish ka safar mahz ek doosre ko paane ka nahi, balki apne Rab ko paane ka safar ban jata hai. Yeh kirdaar apne apne mehaaz par duniya ki tamaam tar mukhalfat aur aazmaishon ka saamna karte hain, yeh jaante hue ke un ki sab se bari taqat unka imaan aur sab se qeemti inaam un ke Rab ki raza hai. 'Zarish-e-Dil' un dilon ki kahani hai jin hon ne saabit kiya ke sacchi mohabbat kabhi kisi shart se nahi darti, balki har shart ko Allah ki raza ki seedhi bana leti hai.