झालिया दर्शन
लाभली स्फूर्ती - समाधान! ज्ञान प्रबोधिनीच्या सुवर्ण महोत्सवानिमित्त २०१२-१३ या वर्षात अनेक पुस्तकं प्रकाशित होत आहेत. 'झालिया दर्शन' हे पुस्तक त्यात आपल्या वैशिष्ट्याने उठून दिसेल. ज्ञान प्रबोधिनीच्या अंबाजोगाई केंद्राचे प्रमुख श्री. प्रसाद चिक्षे यांना त्यांच्या सामाजिक कार्यात भेटलेल्या व्यक्ती आणि आलेले अनुभव यांच हे प्रांजल, मन-बुद्धीला थेट भिडणारं, अंतर्मुख करणारं आणि कृतीचीही प्रेरणा देणारं असं कथन आहे. कार्यकर्त्यांनी अशा प्रकारे अनुभव लिहिले पाहिजेत असं वाटतं कारण समान धर्मी कार्यकर्त्यांना त्यात ओळखीचे सूर भेटतात, दिलासा वाटतो. काही प्रसंगात या जागी आपण असतो तर काय केलं असतं असा विचार होतो. एकून वाचकांसाठीही ती एका वेगळ्या जगाची ओळख असते. आजच्या काळातही पैशाला सर्वस्व न मानणारे, मूल्यांची जपणूक करणारे आणि मनुष्याचा विकास, समाजाचा विकास हे ध्येय धरून काम करणारे कोणी वेडे लोक असू शकतात ही वाचकांना चकित करणारी पण आनंद देणारी गोष्ट असते. 'दर्शन' या शब्दावर सुंदर भाष्य प्रसाद चिक्षे यांनी केलं आहे. त्यांना घडलेल्या व्यक्तींच्या दर्शनात त्यांचं बाह्यरूप, अंतरंग, त्यांच्या लकबी,...