मराठी वाचकांना भावेल अशी माहिती तंत्रज्ञानावरील वैज्ञानिक काल्पनिका कादंबरी सहजी उपलब्ध होत नव्हती. त्यांची मराठी कादंबरीची तृषा भागविण्यासाठी मु.सा.फि.र.चे प्रयोजन !
मु.सा.फि.र. ही आजच्या तरुण पिढीला भावेल अशी एक माहिती तंत्रज्ञानावर आधारित असलेली वैज्ञानिक काल्पनिका आहे.
दिल्लीतील इंडियन इन्स्टिट्यूट ऑफ मॅनेजमेंटमध्ये एम.बी.ए. शिकणाऱ्या मुला मुलींच्या ग्रुपपासून ही कथा सुरु होते. या ग्रुपमधील सर्वच मुले-मुली ही आपापल्या परीने हुशार आहेत. आजची तरुण पिढी राष्ट्रप्रेमाने झपाटलेली आहे. देशासाठी काहीतरी भव्य दिव्य करावे असे प्रत्येकाला वाटते. सुरुवातीला प्रेमकथेचे स्वरूप वाटणारी कथा, प्रत्येक पात्रांच्या योगदानाने वेगळी कलाटणी घेते. रजत या धाडसी पात्राच्या एंट्री नंतर कथा आणखी वेगळे वळण घेते.
वैज्ञानिक काल्पनिका या साहित्य प्रकारात अनेक उपप्रकार मोडतात. मु.सा.फि.र. ही मिलिटरी इंटेलिजन्सशी निगडीत असलेली कथा आहे. गोंधळाचे आणि दहशतीचे वातावरण निर्माण करून भारताच्या प्रगतीस खीळ घालण्याचे आंतरराष्ट्रीय अतिरेकी संघटनाचे इरादे, सौरभ, शिरीन आणि रजत त्यांच्या कुशाग्र बुद्धिमत्तेने उधळण्याचा प्रयत्न करतात. तसे करीत असतांना त्यांना निरनिराळ्या जीवघेण्या संकटांना सामोरे जावे लागते. आजची तरुण पिढी सर्व प्रकारची आव्हाने पेलून संकटांचा नेटाने सामना करण्याची ताकत ठेवून आहे याचा प्रत्यय सौरभ शिरीन आणि रजत या पात्रांच्या धैर्यावरून दिसून येतो .
या कथेतील पात्र आणि प्रसंग हे काल्पनिक असले तरी कथा ज्या ठिकाणी घडत जाते ती स्थळे काल्पनिक नाहीत. कथेत जिवंतपणा येण्यासाठी स्थळांची माहिती विस्ताराने दिलेली आहे. नैनिताल येथील स्थळांचे वर्णन हे जसे प्रत्यक्षात आहे तसेच रेखाटले आहे. नैना पिक किंवा चायना पिकवरून पाहिल्यास खरोखरच चायना बॉर्डरच्या दिशेला असलेले रडारचे अँटेने दिसतात.
मिलिटरी इंटेलिजन्स सर्व्हिसेस नावाची गुप्तहेर यंत्रणा हा कल्पेनेचा आविष्कार आहे.
मु.सा.फि.र. असे सांकेतिक नाव असलेल्या रडार प्रणालीने दिलेल्या दृक्श्राव्य माहितीच्या आधारे रजत अतिरेक्यांची कारस्थाने उधळून लावतो.
पैश्याचा लोभ एखाद्या माणसाला किती खोलवर गर्तेत घेऊन जाऊ शकतो याचे उदाहरण म्हणजे या कथेतील रोहित हे पात्र होय.
कथेची मांडणी अशा रितीने केलेली आहे की क्षणभर असं वाटून जातं, ‘ खरंच असं घडू शकतं ?’ तारुण्य सुलभ साहसातून कशी संकटे उद्भवू शकतात याचे वर्णन सत्यास अनुसरून केलेले आहे. कथेत इंग्रजी शब्दांचा वापर हा अनिवार्य म्हणून केलेला आहे. निव्वळ शुद्ध मराठी शब्द वापरून कथेची मांडणी करता आली असती पण त्यामुळे कथा निष्प्राण होण्याची भीती होती. त्यामुळे प्रचलित इंग्रजी शब्दांचा वापर केलेला आहे.

सुनिल वाईकर