డా.యస్.వి.యస్.కిషోర్ కుమార్ నలభై ఏళ్ళుగా తెలుగు సాహితీ రంగంలో సుపరిచితులు. తన రచనలన్నిటిలో సృజనాత్మకతను జోడించి తనదైన శైలితో చదువరులను ఆకట్టుకోగల సమర్ధులు. బాంకింగ్ రంగంలో ముప్పై ఐదు సంవత్సరాలు వివిధ హోదాలలో పని చేసి వాలంటరీ రిటైర్మెంట్ తీసుకుని ప్రస్తుతం తెలంగాణ రాష్ట్ర హైకోర్ట్, హైదరాబాద్ లో న్యాయవాద వృత్తి కొనసాగిస్తున్నప్పటికీ తెలుగు భాష అంటే మక్కువ, ప్రేమ, అభిమానంతో అడపా దడపా మంచి రచనలు చేస్తూ పాఠకులలో మంచి పేరు సంపాదించుకున్నారు. తెలుగు భాషాభిమానంతో కవితలు, కధలు, నవలలు, సీరియల్స్ రాయడంలో తన వంతు కృషి చేస్తున్నారు. తన రచనలు జీవితం లోతులనుంచి వెలికి తీసినట్లుంటాయి. సామాజిక స్పృహతో రచనలు చేయడం అతని అభిలాష. అతని రచనలలో వినోదం పాలు ఎక్కువగా ఉంటుంది. ఏది రాసినా సమాజానికి ఎంతో కొంత ఉపయోగపడాలన్నదే అతని ఆకాంక్ష. తెలుగు, ఆంగ్లం భాషలలో ఆధ్యాత్మిక రచనలు చేశారు. న్యాయవాదిగా అచిరకాలంలోనే మంచి పేరు తెచ్చుకుని పేదలకు ఉచిత న్యాయసహాయం అందించడంలో ఎప్పుడూ ముందుంటారు.