Yah pustak keval kavitayon ka sangrah nahi hain, balki yah ek pavitra sthal hai, jahan shabd aur chitr naaritva ki divyata ka utsav manate hain. Is chitrit kavya-pustak mei bhaartiya deviyon ki shakti se prerit ho kar aatm-prem, stritva aur aatm-samman ki bhaavnao ko khoobsurti se vyakt kiya gaya hai. Har ek kavita ek darpan ki bhaanti hai, jismei dard, shakti, shaanti aur andar ki chipi hui jwala jhalakti hai. Kabhi durga ki dridta, kabhi saraswati ki shaanti, toh kabhi kaali ki nirbhikta - in panktiyon mei har devi ka roop dekhne ko milta hai. Yah pustak ek yatra ka anubhav karati hai - apne aap ko janane, apnane aur aatmvishwas ke saath khade hone ki. Yadi aap sukoon, taakat aur naaritva ka anubhav karna chahte hain, toh yeh panne aapko thaamte hain, sambal dete hai aur yaad karate hain ki "aap jaaise hain, vaise hi paryapt hain."