Seo an chéad leabhar riamh i nGaeilge ar na Siúméaraigh, pobal a mhair sa Mheaspatáim breis is trí mhíle blian ó shin. Bhíodar ligthe i ndearmad go dtí lár na 19ú haoise nuair a d’éirigh le scoláirí, agus Éireannach ina measc, ciall a dteanga a scaoileadh. Thug saothar na ndaoine léannta seo léas solais dúinn ar a saol, ar a stair agus ar a saíocht; aithníodh go raibh ceangailt idir na Siúméaraigh agus an-chuid nithe a luaitear sa Bhíobla, nithe cosúil leis an tonn tuile mór agus scéal an Pharthais mar shampla.
Tráth dá raibh ann bhí an tSiúméiris ina teanga reiligiúin agus léinn ar fud an Mheán-Oirthir, agus bhain pobail éagsúla leas as a script dhingchruthach chun a saíocht féin a bhuanú. Bhí traidisúin liteartha trí mhíle blian laistiar de theanga na Siúméarach roimh éag di, agus ní beag é sin mar mhaíomh.
Cé go bhfuil na Siúméaraigh faoin bhfód leis na cianta, tá tréithe go léor dá gcuid le haimsiú fós i saol ár linne, gan ach an litríocht is an mhatamaitic a lua. Cuireann eolas futhu lenár dtuiscint orainn féin mar dhaoine daonna. Tá sliocht Ádhaimh faoi chomaoin mhór ag na Siúméaraigh a chruthaigh an chéad ard-sibhialtacht riamh; tá a scéal agus ár scéal fite fuaite ina chéile.