भारतातील अनेक ॠषी मुनींनी निरनिराळे वैज्ञानिक शोध लावल्याचा उल्लेख आपणास आपल्या धर्मग्रंथात किंवा रामायण महाभारत सारख्या महाकाव्यात आढळतो. अशा वक्तव्यांवर आधुनिक वैज्ञानिक बरेचदा टीका करतांना आढळतात.ज्या गोष्टींना शास्त्रीय पुराव्यांसह सिद्ध करता येऊ शकत नाही अशा गोष्टी मिथक या वर्गवारीत मोडून त्या नाकारल्या जातात. इसविसनपूर्व इतिहासात डोकावून बघितल्यास आपणास एक प्रश्न नेहमीच पडतो की त्याकाळच्या भारतीय लोकांना खरेच एवढे आधुनिक ज्ञान होते काय? हे जर खरे मानले तर आपण असे म्हणावे काय की रामायण, महाभारत, भगवद्गीता हे ग्रंथ केवळ कविकल्पनांचा आविष्कार आहेत? रामायण, महाभारत वास्तवात घडून गेल्याचे अनेक पुरावे उपलब्ध आहेत.मग प्रश्न असा पडतो की त्याकाळी मानवास असलेले आधुनिक ज्ञान कोठे लोप पावले?काळाच्या ओघात ते ज्ञान कुठे नष्ट झाले असावे? त्याचा मागोवा कुठेच कां लागू शकत नाही? बरेचसे प्राचीन ज्ञान संस्कृत ग्रंथात असावे.असे ग्रंथ व ते ज्ञान भारतावर आक्रमण करणाऱ्या जेत्यांनी नष्ट केले असावेत असाही एक विचार प्रवाह आहे.नालंदा विश्वविद्यालयाच्या ग्रंथालयात बरेच दुर्मिळ ज्ञानग्रंथ होते असे देखील आपण वाचलेले आहे.त्या ग्रंथांचे आणि त्या ज्ञानाचे काय झाले?हा प्रश्न जेंव्हा पडतो तेंव्हा ते ग्रंथ तेथे अध्ययन करणाऱ्या परदेशस्थ अभ्यासकांनी पळविले असा विचार प्रवाह आहे.त्या ग्रंथालयास लागलेल्या आगेत उरलेले नष्ट करण्यात आले.
बरेच ज्ञान अद्भुत शम्बाला नगरीत आहे असे देखील दाखले आहेत.
शम्बाला विषयी अनेक ग्रंथात उल्लेख आढळतो. शम्बाला हे ज्ञानाचे भांडार आहे हे अनेक तत्त्वज्ञांना माहीत आहे.शम्बाला हे नेमके कुठे वसले आहे याबद्दल अनेक मते आहेत.
हाच विषय आणि उपलब्ध संदर्भ घेऊन कालचक्रची रचना केलेली आहे.या कथेत आपणास शम्बालाची देखील सफर घडणार आहे.
कालचक्र वाचतांना आपणास नक्कीच असे वाटावे की, खरेच असे असू शकते.याचा प्रामाणिक प्रयत्न केला आहे.
कालचक्र ही एक अशी वैज्ञानिक कादंबरी आहे ज्यातील स्थाने,व्यक्ती आणि घटना यांना विज्ञानाच्या आधारावर पारखता येऊ शकतील.
आज सारे जग निरनिराळ्या ग्रहांवर जीवसृष्टी आहे काय? हे शोधण्यासाठी वेगवेगळे संशोधन करीत आहे.असे संशोधन करीत असतांनाच चंद्रावर मानवाने आपल्या पाऊल खुणा उमटवून पन्नास वर्षांहून अधिक कालावधी लोटला आहे.त्यानंतर मात्र मंगळावरील संशोधनाचा विचार केला तर आपण तितके पुढे गेलेलो नाहीत. भारतीय अंतराळ विज्ञान संशोधन संस्था,इस्रोने गत काही वर्षात नेत्रदीपक प्रगती केली आहे.मंगळावर मानवाने जाणे योग्य की अयोग्य ?याचा शोध या कादंबरीत घेतला आहे.
सुनील वाईकर