என்னைப் பற்றி...
புராணச் சிறப்பும், ஆலயச் சிறப்பும் கொண்ட தரணி புகழ் தஞ்சையைப் பிறந்த ஊராகக் கொண்ட பெற்றோரின் மகளாகப் பிறந்தவள் நான். சிறு வயதில் அம்மா நிலாச் சோறுடன் சேர்த்து அன்பு, நற்பண்பு, பாசம், நேசம் இவற்றோடு கூடவே இசை, ஓவியம், கோலம், தையல், சமையல், எழுத்து இவற்றிலும் ஆர்வத்தை உண்டாக்கினார். இளம் வயதில் திருமணம் புரிந்து கொண்ட என்மீது அளவற்ற அன்பும், பாசமும் கொண்ட கோபம் என்றால் என்னவென்று தெரியாத அருமையான கணவர்!

நாற்பத்தைந்து வருடங்களுக்கு முன் நான் எழுதிய ஒரு கட்டுரை பிரபல மகளிர் இதழில் பிரசுரமாக, என்னைவிட மகிழ்ச்சி அடைந்தவர்கள் என் அம்மாவும், என் கணவரும். வார, மாத இதழ்களில் எழுதுவது என் எண்ணங்களை வெளிப்படுத்த ஒரு வாய்ப்பாக அமைந்தது. நான் எழுதிய கதை, கவிதை, கட்டுரை, சமையல் குறிப்புகள் ஆகியவற்றை புத்தகமாக வெளியிட்டு வருகிறேன்.