जुन्नर तालुक्यातील सह्याद्रीच्या कुशीत आणि हरिश्चंद्र गडाच्या पायथ्याशी वसलेले कोल्हेवाडी गाव येथे सामान्य कुटुंबात माझा जन्म झाला. गावात फक्त इयत्ता सातवी पर्यंतचे शिक्षण दिले जात होते, पुढील शिक्षण शेजारीच असलेल्या खिरेश्वर गावा येथील शासकीय आश्रम शाळेत मी माझे दहावी पर्यंतचे मोफत शिक्षण पूर्ण केले. दहावी पर्यंतचे शिक्षण घेणे शासकीय आश्रमशाळेमुळे खूप सोपे झाले होते परंतु पुढील शिक्षण खर्चिक आणि बाहेरगावी असल्याकारणाने या परिसरातील बहुतेक तरुण तरुणी दहावी नंतर शिक्षणाला राम-राम देत असायचे. माझ्याबाबतीतही हेच होते की काय असा प्रश्न माझ्या मनात निर्माण झाला. मला समोर फक्त अंधार दिसत होता. कुठे तरी आशेचा किरण दिसावा म्हणून प्रयत्न करत होतो यातच माझा हात संपूर्ण जबाबदारीने माझ्या ताई आणि दाजी (जिजु) यांनी पकडला. मी पुढील शिक्षणासाठी ताईच्या सासरी येऊन राहू लागलो पुढे ठाणे जिल्ह्यातील शहापूर तालुक्यात मी वाणिज्य शाखेतून बँकिंग आणि विमा या शेत्रात पदवी पर्यंतचे शिक्षण पूर्ण केले. पुढील शिक्षणासाठी प्रयत्न केले पण ते निष्फळ झाले आणि हेच माझे शेवटेचे शिक्षण झाले. एकांतपणे निसर्गात फिरणे, विविध भाषेतील चित्रपट पाहणे, फक्त म्युझिक असलेली गाणी ऐकणे, पुस्तके वाचणे, एखादी गोष्ट पहिली की तिच्या विषयी मनोमनी गोष्ट तयार कारणे, यातच मी माझे आयुष्य जपत होतो. मनात खूप वर्ष साठून ठेवलेली ही गोष्ट कधीतरी लिहावी आणि जगाला दाखवावी वाटत होते आणि तोच हा योग. माझ्याबद्दल लिहिण्यासारखं जास्त काही नाहीये त्यामुळे मी इथेच थांबतो.