डॉ. श्रुतीका काशिनाथ मगर या आयुर्वेदाचार्य, सर्जन, ग्राफोलॉजिस्ट आणि वृद्धत्वाच्या आरोग्यदायी जीवनप्रवासाकडे विशेष संवेदनशीलतेने पाहणाऱ्या वैद्य आहेत. वैद्यकीय ज्ञान, आयुर्वेदातील शाश्वत तत्त्वे आणि मानवी भावनांचा सखोल अभ्यास यांचा सुंदर संगम त्यांच्या लेखनात दिसून येतो.

स्त्री आरोग्य, मेनोपॉजनंतरचे बदल, मानसिक आरोग्य, रसायन चिकित्सा, योग व जीवनशैली यावर त्यांनी सातत्याने मार्गदर्शन केले आहे. केवळ आजारांवर उपचार न करता, माणसाला समजून घेणे, त्याच्याशी संवाद साधणे आणि आयुष्याकडे सकारात्मक नजरेने पाहायला शिकवणे हा त्यांच्या कार्याचा मुख्य उद्देश आहे.

आई–वडिलांसमान ज्येष्ठ नागरिकांविषयी असलेली आत्मीयता आणि आदरभावना त्यांच्या लेखनात स्पष्टपणे जाणवते. “कारण तुम्ही आहात… ६०+ मास्टरपीस” या पुस्तकातून त्या वृद्धत्वाला उतरती कळा नव्हे, तर अनुभवांनी समृद्ध असा सुवर्णकाळ म्हणून मांडतात.

डॉ. श्रुतीका यांचे लेखन म्हणजे वैद्यकीय मार्गदर्शनासोबतच एक प्रेमळ संवाद आहे .
जो वाचकाला स्वतःकडे नव्याने पाहायला, स्वतःवर विश्वास ठेवायला आणि आयुष्य आनंदाने जगायला प्रेरित करतो.