જીવનની દોડધામ અને વિશેષ કરીને MBBS જેવા કઠિન અને અત્યંત વ્યસ્ત અભ્યાસક્રમ વચ્ચે મનની શાંતિ મેળવવી એ એક લહાવો છે. મારા MBBS ના અભ્યાસ દરમિયાન મારી દિનચર્યાનો એક અત્યંત અગત્યનો ભાગ ભગવાનનાં પુસ્તકો વાંચવાનો પણ રહેતો હતો. આ જ નિત્યક્રમ અને વાંચન દરમિયાન મારા હૃદયમાં ઈશ્વર પ્રત્યેનો ભક્તિરસ ક્યારે જાગૃત થઈ ગયો, તેની મને પોતાને પણ ખબર ન રહી. પ્રભુભક્તિના એ અદ્ભુત રસમાં મને એક અલગ જ પ્રકારની ઉર્જા અને સકારાત્મક્તાનો અનુભવ થયો.

સામાન્ય રીતે મેં નોંધ્યું છે કે, ઓનલાઈન કે ઓફલાઈન મળતાં ધાર્મિક પુસ્તકો અને ગ્રંથો ખૂબ જ વિસ્તૃત અને વધુ પાનાંવાળા હોય છે. આજના આ ઝડપી યુગમાં સમયના અભાવે આપણે ઘણીવાર તે પુસ્તકો પૂરાં વાંચી શકતા નથી અથવા તો તેને અધવચ્ચેથી જ છોડી દઈએ છીએ. આપણા ધર્મના મહાન પાઠો અને ઈશ્વરની લીલાઓ લોકો સુધી સરળતાથી પહોંચવી જોઈએ, એવા વિચારથી જ આ પુસ્તકનો જન્મ થયો છે.

એટલા જ માટે મેં આ પુસ્તકમાં દેવાધિદેવ મહાદેવના 19 અવતારોની કથા અને તેમના ઉદ્દેશ્યને અત્યંત સાદી, સરળ અને સહજતાથી સમજાઈ જાય તેવી ભાષામાં આલેખવાનો એક નમ્ર પ્રયાસ કર્યો છે. મારો મુખ્ય હેતુ એ છે કે ઘરના વૃદ્ધોથી લઈને નાના બાળકો પણ શિવજીના આ વિવિધ અવતારોનો મહિમા આસાનીથી સમજી શકે. એટલું જ નહીં, પણ દરેક અવતારની પાછળ છુપાયેલી સચોટ 'શીખ' ને તેઓ પોતાના જીવનમાં ઉતારીને એક સાચા અને પ્રગતિશીલ માર્ગે આગળ વધી શકે.