ਕਵਿਤਾ ਮਨੁੱਖ ਦੇ ਅੰਦਰਲੇ ਜਜ਼ਬਾਤਾਂ ਦੀ ਆਵਾਜ਼ ਹੈ, ਅਤੇ ਗ਼ਜ਼ਲ ਉਸ ਦੀ ਲੈਅ ਹੈ। ਜਦੋਂ ਅਸੀਂ ਆਪਣੇ ਮਨ ਦੀਆਂ ਭਾਵਨਾਵਾਂ ਨੂੰ ਕਾਗਜ਼ 'ਤੇ ਲਿਖਦੇ ਹਾਂ, ਤਾਂ ਮਨ ਨੂੰ ਇੱਕ ਅਲੌਕਿਕ ਹਲਕਾਪਣ ਦਾ ਅਹਿਸਾਸ ਹੁੰਦਾ ਹੈ। ਇਹ ਇੱਕ ਅਜਿਹਾ ਤਜਰਬਾ ਹੈ ਜਿਸ ਨੂੰ ਕੋਈ ਹੋਰ ਤਰੀਕੇ ਨਾਲ ਪਾਇਆ ਨਹੀਂ ਜਾ ਸਕਦਾ। ਹਾਲਾਂਕਿ ਸਾਰੀਆਂ ਕਵਿਤਾਵਾਂ ਨੂੰ ਇਕੱਠਾ ਕਰਕੇ ਇੱਕ ਕਿਤਾਬ ਵਿੱਚ ਸ਼ਾਮਲ ਕਰਨਾ ਵੀ ਇੱਕ ਵੱਡੀ ਜ਼ਿੰਮੇਵਾਰੀ ਹੈ, ਜੋ ਹਰ ਕਿਸੇ ਦੇ ਵੱਸ ਦੀ ਗੱਲ ਨਹੀਂ।

ਤੇ ਇਸ ਤੋਂ ਉਪਰ ਇਸ ਕੰਮ ਨੂੰ ਕਿਸੇ ਔਰਤ ਦੇ ਹੱਥੋਂ ਮੁਕੰਮਲ ਹੋਣਾ ਬਹੁਤ ਵੱਡੀ ਜਿੱਤ ਦੇ ਬਰਾਬਰ ਹੈ ਕਿਉਂਕਿ ਉਸਤੇ ਘਰ ਦੀ ਸੰਭਾਲ ਅਤੇ ਬਾਹਰਲੇ ਕੰਮ ਦੀ ਦੋਹਰੀ ਜਿੰਮੇਵਾਰੀ ਹੁੰਦੀ ਹੈ। ਇਸ ਕਿਤਾਬ ਦੇ ਹਰ ਕਵੀ ਦੀ ਕਵਿਤਾਵਾਂ, ਉਸਦੇ ਨਾਮ ਦੀ ਤਰ੍ਹਾਂ ਮਨੁੱਖ ਦੇ ਅੰਦਰਲੇ ਰੌਸ਼ਨ ਪੱਖ ਨੂੰ ਜਾਗਰਿਤ ਕਰਦੀਆਂ ਹਨ। ਸ਼ਾਇਰਾ ਜੋਤੀ ਬਜਾਜ ਦੁਆਰਾ ਸੰਪਾਦਿਤ ਪੁਸਤਕ "ਰੀਝਾਂ ਦੀ ਲੋਹ" ਕਿਤਾਬ ਵਿੱਚ ਸ਼ਾਇਰਾਂ ਨੇ ਆਪਣੇ ਦਿਲ ਦੀਆਂ ਭਾਵਨਾਵਾਂ ਨੂੰ ਇਸ ਤਰ੍ਹਾਂ ਰੋਸ਼ਨ ਕੀਤਾ ਹੈ ਕਿ ਉਹ ਪੜ੍ਹਨ ਵਾਲਿਆਂ ਦੀ ਰੂਹ ਤੱਕ ਪਹੁੰਚਦੀ ਹੈ।

ਸ਼ਾਇਰਾ ਜੋਤੀ ਬਜਾਜ ਅਤੇ ਇਸ ਕਿਤਾਬ ਚ’ ਅਜਿਹੇ ਨਾਮ ਹਨ ਜਿਨ੍ਹਾਂ ਨੂੰ ਕਿਸੇ ਪਹਿਚਾਣ ਦੀ ਲੋੜ ਨਹੀਂ। ਉਨ੍ਹਾਂ ਦੀਆਂ ਰਚਨਾਵਾਂ ਆਪਣੇ ਆਪ ਉਹਨਾਂ ਨੂੰ ਹਰ ਦਿਲ ਵਿੱਚ ਇੱਕ ਵੱਖਰਾ ਸਥਾਨ ਦੇ ਰਹੀਆਂ ਹਨ। ਮੇਰੀ ਇਸ ਕਿਤਾਬ ਲਈ ਸਾਰੇ ਕਵੀਆਂ ਨੂੰ ਸ਼ੁਭਕਾਮਨਾਵਾਂ ਤੇ ਪਿਆਰ। ਇਹ ਨਿਸਚਿਤ ਤੌਰ ਤੇ ਅਦਬ ਦੇ ਖਜ਼ਾਨੇ ਵਿੱਚ ਇੱਕ ਮਹੱਤਵਪੂਰਨ ਯੋਗਦਾਨ ਹੈ।

ਨੀਲੂ ਬੱਗਾ ਲੁਧਿਆਣਵੀ (ਅਲਫ਼ਾਜ਼- ੲ-ਅਦਬ ਪ੍ਰਧਾਨ)