நான் நடுத்தர வயதை கடந்த ஒரு சாமான்ய குடும்பத்தலைவன். தமிழ் முக்கலைகளை படித்து, கேட்டு, பார்த்து அதில் மெய்மறப்பதில் ஆர்வம் கொண்டவன். அவ்வப்போது சிறுசிறு முயற்சிகளையும் செய்து பார்த்து என்னுள் மகிழ்வதும் உண்டு.

அத்தகைய முயற்சிகளில் ஒன்றாக, “உலக பொதுமறை” என்று போற்றப்படுகின்ற திருக்குறளில் என்ன இருக்கிறது என்று அறிகிற ஆர்வம் என்னுள் எழுந்தது. ஒன்றே முக்கால் அடியில் உலகை அளந்த திருக்குறளை ஒரு வரியில் எளிமைப்படுத்தி பார்த்தால் எப்படி இருக்கும் என்கிற எண்ணம் மனதில் தோன்றியது.

திருக்குறளை அப்படியே படித்து உரை எழுதும் தமிழ் புலமை எனக்கில்லை. எனவே, திருக்குறள் உரைகளை தினமும் ஒவ்வொரு குறளாக படித்து, புரிந்து, அதனை என்னுள் வாங்கி, ஒரு வரியில் உரையாக எழுதும் முயற்சியைத் தொடங்கினேன். பத்து குறள் கொண்ட அதிகாரத்திற்கும், கடைசியாக ஒரு பத்தியில் அதிகாரச் சுருக்கமும் எழுத முற்பட்டேன். விடா முயற்சியுடன், தினமும் நாள் தவறாது, நேர கட்டுப்பாட்டுடன் உழைத்ததில், அந்த முயற்சி இந்த நூல் வடிவில் வெற்றிகரமாக நிறைவேற்றப்பட்டுள்ளது.