చిత్రాడ కిషోర్ కుమార్ 1969 ఫిబ్రవరి 10వ తేదీన శ్రీకాకుళం జిల్లా, బూరగాం గ్రామంలో శ్రీ చిత్రాడ రామారావు (విరమణ పొందిన ఉపాధ్యాయులు), శ్రీమతి స్వరాజ్యలక్ష్మి దంపతులకు రెండవ సంతానంగా జన్మించారు.

ప్రాథమిక, ప్రాథమికోన్నత, ఉన్నత విద్యలను బూరగాం, సోంపేట, బారువ (శ్రీకాకుళం జిల్లా) ప్రాంతాల్లో అభ్యసించారు. అనంతరం బారువలో డిగ్రీ పూర్తి చేసి, హైదరాబాద్‌లో కంప్యూటర్స్, టెస్టింగ్ టూల్స్, గ్రాఫిక్ డిజైనింగ్ రంగాల్లో ఉన్నత విద్యను అభ్యసించారు. మనసులో నిక్షిప్తమైన భావాలకు అక్షరరూపం ఇవ్వాలనే తపనతో రూపుదిద్దుకున్న తొలి కవిత "స్నేహం" ద్వారా 1989లో ఆయన కవితా ప్రస్థానం ప్రారంభమైంది. అనంతరం ప్రచురితమైన తొలి కవిత "భారగీతం" 1990 మార్చి 22న ఆంధ్రప్రభ దినపత్రికలో వెలువడి, సాహిత్యరంగంలో ఆయనకు తొలి గుర్తింపును తీసుకొచ్చింది.

మూడు దశాబ్దాలకు పైగా కొనసాగుతున్న తన సాహిత్య ప్రస్థానంలో కవిత్వం, నాటకం, దేశభక్తి గేయం, సూక్తులు (కోట్స్) వంటి అనేక ప్రక్రియల్లో రచనలు చేసి తెలుగు సాహిత్యంలో ప్రత్యేకమైన స్థానాన్ని సంపాదించారు. ప్రకృతి వైపరీత్యాలు, సామాజిక సమస్యలు, అసమానతలు, సమాజ చైతన్యం, మానవతా విలువలు, పర్యావరణ పరిరక్షణ, జీవన తాత్త్వికత, దేశభక్తి వంటి విభిన్న అంశాలపై స్పందిస్తూ సృజనాత్మక రచనలు కొనసాగిస్తున్నారు.