ಡಾ. ಸುಧಾ ಜಿ ಅವರು ಕರ್ನಾಟಕ ಸರ್ಕಾರದ ಕಾಲೇಜು ಶಿಕ್ಷಣ ಇಲಾಖೆಯ ಕೊಳ್ಳೇಗಾಲದ ಸರ್ಕಾರಿ ಪದವಿ ಕಾಲೇಜಿನಲ್ಲಿ ರಾಜ್ಯಶಾಸ್ತ್ರ ಸಹ ಪ್ರಾಧ್ಯಾಪಕರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಕಥೆ, ಕವನ, ನಾಟಕ, ಲೇಖನ ಬರೆಯುವ ಹವ್ಯಾಸದ ಸುಧಾ ಹಿಂದಿ, ಇಂಗ್ಲಿಷ್ ಹಾಗೂ ತೆಲುಗಿನಿಂದ ಅನೇಕ ಕಥೆ, ಕಾದಂಬರಿಗಳನ್ನು ಕನ್ನಡಕ್ಕೆ ಅನುವಾದಿಸಿ ಕೊಟ್ಟಿದ್ದಾರೆ. ಎರಡು ಮೂರು ವಾಕ್ಯಗಳಲ್ಲಿ ಪ್ರತಿದಿನವೂ ಸಾಮಾಜಿಕ ಕಳಕಳಿಯ ಸಂದೇಶವುಳ್ಳ ಪುಟ್ಕಥೆಗಳನ್ನು ಬರೆಯುತ್ತಿದ್ದಾರೆ. ಸ್ತ್ರೀ ಪರವಾದ ಅಪಾರ ಕಾಳಜಿಯ ಸುಧಾ ತಮ್ಮ ಜೀವಪದ ಕವಿತೆಗಳ ಸಂಕಲನದ ಮೂಲಕ ಕವಯತ್ರಿಯಾಗಿಯೂ ತಮ್ಮ ಪ್ರತಿಭೆ ಸಾಮರ್ಥ್ಯವನ್ನು ಇಲ್ಲಿ ಬಿಂಬಿಸಿದ್ದಾರೆ.ಹಾಡು, ಪ್ರವಾಸ, ಚಾರಣ, ಅಧ್ಯಯನ ಇವರ ಆಸಕ್ತಿಯ ಕ್ಷೇತ್ರಗಳಾಗಿವೆ. ಸ್ತ್ರೀವಾದಿ ಚಳವಳಿಯಲ್ಲಿ, ಸಾಮಾಜಿಕ ಸೇವೆಯಲ್ಲಿ ತೊಡಗಿಸಿಕೊಂಡ ಸುಧಾ ತಾವು ಕಾರ್ಯನಿರ್ವಹಿಸುವ ತಾಣಗಳಲ್ಲಿ ಸಾಹಿತ್ಯ ವೇದಿಕೆ, ಮಹಿಳಾ ಸಂಘಗಳನ್ನು ಆರಂಭಿಸಿ ಉಳಿದವರನ್ನು ಸಾಹಿತ್ಯದೆಡೆಗೆ, ಮಹಿಳಾ ಜಾಗೃತಿಯ ಕಡೆಗೆ ಕರೆದೊಯ್ಯುತ್ತಾರೆ.