یہ کتاب حافظ آباد کی علاقائی تاریخ ہے جس میں حافظ آباد سے جڑی اہم معلومات جمع کی گئی ہیں جہاں تک ممکن ہوسکا عام لوگوں کی معاشرت اور مقامی خصوصیات کو اجاگر کیا گیاہے ۔ آج کے ضلع حافظ آباد میں بسنے والے عام لوگوں اور اس ضلع کی علاقائی خصوصیات کے متعلق جتنی معلومات یونانی تاریخ نویسوں سے لے کرانگریز دور تک کے نجی ہوں یا سرکاری مصادر جہاں سے بھی ملی انہیں جمع کرکے تواریخ حافظ آباد کے نام سے شائع کیا جارہا ہے، حافظ آباد کے متعلق اس کتاب سےپہلے محترم عزیز علی شیخ، اور پروفیسر اسد سلیم شیخ انتہائی مفید معلومات اپنی اپنی کتب میں رقم کرچکے ہیں اور مزید کے لیےکوشاں بھی ہیں لیکن میں نے اس کتاب میں کوشش کرکے ان معلومات کو جمع کیا ہےجو ان کتب میں دستیاب نہیں تھیں یا جن کا تذکرہ جامع انداز سے میسر نہیں تھا اور ایسا کرنے کا مقصد حافظ آباد کے متعلق معلومات میں اضافہ کرنا اور تاریخ کو محفوظ کرنا تھا مصنف کا تعلق چونکہ اسی ضلع حافظ آباد کے گاوں نوتھیں سے ہے لہذا اس ضلع کے متعلق معومات جمع کرنے کا جذبہ ایک فطری عمل تھا حافظ آباد کی سر زمین وہ خطہ ہے جس میں زمانہ قبل از مسیح سے مختلف قبائل اور حکمرانوں کا آنا جانا رہا، کئی جنگجو اور قبائل اس خطہ پر وارد ہوئے اور وقت آنے پر چلتے بنے کئی ایسے بھی تھے جوآکر یہیں کے ہوکر رہ گئے اور حافظ آباد کی سر زمین کو آباد کرتے ہوئے اس کی تاریخ کا حصہ بن گئے یہاں تک کہ 1947 آن پہنچا جس سال آخری بار یہاں سے کئی قبائل اجڑ کر چلتے بنے اور کئی اجڑ کر یہاں آباد ہوگئے۔ یہ کتاب ایسی ہی آبادیوں اور بربادیوں کی داستان ہے۔