1949 జూన్ 26న పశ్చిమ గోదావరి, పాలకొల్లు పక్క పల్లెటూరులో జననం. పెరిగింది సఖినేటిపల్లిలో. ఎలక్ట్రికల్ ఇంజినీరింగ్ (1966-71) పట్టభద్రత, ఆంధ్రా యూనివర్సిటీ, విశాఖపట్నం నుండి. ఆ టైమ్ లోనే జరిగింది, వివేకానంద, గాంధీ, శరత్ చంద్ర, ఠాగోర్, ప్రేమ్ చంద్, గోపీచంద్, చలం, బుచ్చిబాబు, రావిశాస్త్రి, కార్ల్ మార్క్స్, శ్రీశ్రీ మొదలైన వారి పుస్తకాలు చదివడం. చుట్టూ కనపడే దారిద్ర్యం, అన్యాయం, అవినీతి, మతపర మూఢ నమ్మకాలూ మానసిక విప్లవ భావాలను రేపేయ్. అప్పటి రచనా వ్యాసంగం కొన్ని కథలూ, కొన్ని కవితలతో అక్కడే ఆగింది. అక్కడే జరిగింది, అంధ విశ్వాసాల నుండీ, మతపర ఛాందస సంప్రదాయ సంస్కృతుల నుండీ శాశ్వత విముక్తి. తరవాత కాకినాడ JNTU లో M.Tech. మధ్యలో BHEL లో ఉద్యోగంలో జేరడం జరిగింది. 2003 లో BHEL నుండి స్వచ్ఛంద ఉద్యోగ విరమణ.
తరవాత వేదోపనిషత్తులూ, భౌద్ధం, బైబిలు, ఖురాన్, పతంజలి, రజనీష్, మహేష్ యోగి, ముఖ్యంగా జిడ్డు కృష్ణమూర్తి గారి పుస్తకాలూ చదవడం జరిగింది. God, mind, time, free will అనబడేవేవీ అసలు లేనే లేవని నిర్ధారణ అయింది. నాలోని శేషప్రశ్నలకు జవాబులు యింకా వెతుకుతుండగా, జూన్ 2015 లో, జిడ్డు కృష్ణమూర్తి గ్రూపు లోని ఒక మిత్రుని ద్వారా యు.జి. కృష్ణమూర్తిని గురించి వినడం, యూజీ పుస్తకాలు నెట్ లో చదవడం. యుజీ మాటల్లో ఏదో తెలియని కొత్తదనం కనిపించి, ముఖ్యమైన యూ‌జీ పుస్తకాలలో ఒకటైన The Mystique of Enlightenment అనే పుస్తకాన్ని తెలుగు చేయడం జరిగింది. ఆ వరసలో ఈ పుస్తక అనువాదం మూడవది. “కావలసినది సమాధానాలు కాదు, ప్రశ్నలు అంతమవడం ముఖ్యం,” అంటాడు యుజీ.