అక్షరం ఎప్పుడూ ఒక ప్రవాహం. అది మనసు పొరల్లోంచి మాటగా మారినప్పుడు ఒక తీపి అనుభూతినిస్తుంది. కానీ, కొన్ని భావాలు మాటల రూపం తీసుకోలేనంత బరువుగా ఉంటాయి. అవి పెదవి దాటలేక, గుండె లోతుల్లోనే సుడులు తిరుగుతూ ఉంటాయి. అవే నా ఈ మౌన కెరటాలు".
నా మొదటి పుస్తకం "మనసు-మాటలు" లో నన్ను నేను వెతుక్కునే ప్రయత్నం చేశాను. నాలోని భావాలను ప్రపంచానికి పరిచయం చేశాను. కానీ, కాలం గడిచేకొద్దీ మనిషికి మాటలకంటే మౌనం ఎక్కువైపోతుంది. ఆ మౌనం ఊరికే ఉండదు. అది లోపల ఒక సముద్రంలా అలజడి సృష్టిస్తుంది. ఆ నిశ్శబ్దపు సముద్రం నుంచి ఎగసిపడ్డవే ఈ కవితలు.