“Baalman ko chhooti ek tilismi katha, jo bachchon ki kalpana ko naye pankh deti hai.” — Surbhi Singhal, Bestseller Lekhika

“Kuch kahaniyan samaapt hone ke baad bhula di jaati hain, lekin iska rahasya pustak band karne ke baad bhi saath rehta hai.” — Rupesh Kumar, Lekhak evam Anchor

“Saundarya ke peeche chhipe andhere ki kahani, yahi is upanyas ki sabse badi visheshata hai.” — Chetan Chauhan, Lekhak evam Samajik Chintak

“Kalpana aur romanch ki adbhut yatra, jo paathak ko aarambh se hi apne mohpaash mein baandh leti hai.” — Sandeep Sharma, Bestseller Lekhak evam Banker

Ek shikaar yatra par nikle Shergarh ke nyaypriya Maharaj Suyash Dev anjaane mein pahunch jaate hain Sundarvan, ek aisa rahasyamayi van, jahan phool aankhon ko bhramit karte hain, sugandh smritiyon ko baandh leti hai aur raaste pal-pal apna roop badalte hain.

Is mayavi sansaar mein unki bhent hoti hai adbhut sundari Bhadrika se, jiska daava hai ki keval Maharaj hi Sundarvan ko varshon purane tilism se mukt kar sakte hain. Lekin uske bhole chehre aur madhur shabdon ke peeche chhipa hai ek aisa rahasya, jo na keval Suyash Dev ke jeevan, balki poore Shergarh ke bhavishya ko andhkaar mein dhakel sakta hai.

Udhar rajmahal mein Maharani Garima ka vishwas, Rajmata ki aashankayein aur ek ke baad ek ghatati ashubh ghatnayein aane wale sankat ki chetavani de rahi hain.

Kya Maharaj Sundarvan ke moh-jaal se bahar nikal payenge?

Kya Garima ka prem us tilism ko tod sakega?

Ya Shergarh par phir lautegi woh purani chhaya, jiska bhay samay bhi nahi mita paaya?

Prem, rahasya, chhal aur alaukik shaktiyon se buni ek romanchak gaatha, Sundarvan ka Tilism.