"Kya sirf apne desh se pyaar karna hi kaafi hai, ya desh ke asal bhale ke liye kaam karna zyada zaroori hai? Yeh kitab Bharat ke yuvaon ko isi sabse mukhya sawal par sochne ke liye majboor karti hai."

Hum aksar deshbhakti ki baatein karte hain, rashtragaan gaate hain, tirange ka sammaan karte hain aur apne desh ke prati apna pyaar jahir karte hain. Par kya desh ke prati hamari zimmedari sirf bhawnaon tak hi simit hai? Kya sacchi deshbhakti sirf lafzon aur naaron me hoti hai, ya phir desh ke hit me liye gaye kathin faislon aur kaamon me bhi?

Yeh kitab deshprem ke naam par ho rahe paakhand, bhrashtachhar aur jhoothe rashtrawad ka pardaafash karti hai. Jo log stage par khade hokar deshbhakti ke bhaashan dete hain, wohi log band kamron me desh ki property loot-te hain. Jo khud ko desh ka sabse bada rakshak batate hain, wohi apne bachon ko safe future ke liye videsh bhej dete hain. Kya yeh deshbhakti hai, ya sirf ek dikhawa?

Is kitab ke 9 chapters me lekhak ne Bharat ki us dardnak, nangi aur kadwi sachai ko samne rakha hai jo hamari textbooks me kabhi nahi padhayi gayi:

@ Bachpan Ka Sabse Bada Dhokha – Schools me sikhaye gaye aadarsh aur samaj ki kadwi reality.

@ Deshprem Ka Dhandha – Kaise nafrat aur naaron ke dum par deshbhakti bechi ja rahi hai.

@ Kaagzi Tarakki – GDP ke aakdon aur zameen ki badhaali ke beech ka antar.

@ Khaki, Kachhari Aur Lachari – Law system ka sach aur aam aadmi ki majboori.

@ Beemar Vyavastha – Kaise hospitals market ban gaye aur ilaj ek mehanga business.

@ Bikaau Bachpan – Education ki unchi dukaanein aur rattu toota banti hamari generation.

@ Screen Me Kaid Insaaniyat – Digital duniya ne hamare rishton ko kaise khokhla kar diya.

@ Consumerism Ka Maayajaal – Ads aur brands ki gulami.

@ Antim Thehraav – Sab kuch pa liya, par apna 'wajood' kahan chhod aaye?

Yeh kitab kisi person, organization ya ideology ka support ya oppose nahi karti. Iska main purpose Bharat ke youth ko ek zaroori sawal par vichar karne ke liye inspire karna hai – kya desh ko sirf pyaar ki zaroorat hai, ya aise nagrikon ki jo har situation me rashtrahit ko sabse upar rakhein?

Yeh kitab Bharat ke un sabhi yuvaon ke liye hai – jo sirf apne future ka nahi, balki apne desh ke future ka bhi sapna dekhte hain. Un yuvaon ke liye, jo sawal poochne ki himmat rakhte hain, sach ko accept karne ka sahaj rakhte hain, aur desh ke hit me khade hone ka dum rakhte hain.