جماعت احمدیہ بھدرواہ کے بعض افراد کی دیرینہ خواہش کو مکرم ظفر اللہ عزیز منڈاشی صاحب نے نظارت نشر و اشاعت کی اجازت سے کتابی شکل میں پورا کیا ہے۔ یہ ایک قابلِ قدر کاوش ہے جس سے آنے والی نسلیں مستفید ہوتی رہیں گی۔ میں نے اس کتاب کا بغور مطالعہ کیا ہے۔ مصنف نے محنت سے اس کتاب کے مواد کو حاصل کیا اور حالات و واقعات کو خوش اسلوبی کے ساتھ کتابی شکل دی ہے۔ کتاب میں بعض ایمان افروز واقعات بھی بیان کیے گئے ہیں جو قبولِ احمدیت کے سلسلے میں وقتاً فوقتاً ظاہر ہوتے رہے ہیں۔

یہ پہلی ایسی کتاب ہے جس میں بھدرواہ میں احمدیت کے پھیلنے کا تفصیل سے ذکر ملتا ہے۔ ابتداء سے تا ایں دم جملہ خاندان کے حالات و واقعات کو یکجا صورت میں شائع کرنا یقیناً ایک اہم کارنامہ ہے، جس سے آئندہ تاریخ بھدرواہ لکھنے میں آسانی ہوگی۔ اس کتاب کا بغور مطالعہ کرنے والوں کو جہاں ابتدائی احمدی بزرگان کے قبولِ احمدیت کے حالات کی جانکاری ملے گی، وہیں ان کے ایمان میں ترقی بھی ہوگی۔